​​Mir turned jewiils am Mittwuch (20.00 bis 21.45 Uhr) i dr Turnhalle Zweiggarte. Usser natürli währed dä Schuelferie - oder wämer suscht öppis mached (Abedbummel, Minigolf, Pischtoläschüsse)
PS: bim Menü "ÜBER UNS" (rechts oben) chänd ihr ücheri Wünsch und Frage inäschribä.
​
​

Am 17. Januar 2026 hät de letscht Hauptversammlung vu dä Turnerinne und em Fraueturnä stattgfunde. Am glichligä Tag hämmer d Fusionsversammlig mit em Turnverein gka. Jetz gits nu nuch ei Vorstand für alli turnende Verein ds Netschtel. Meh under www.tvnetstal.ch

Nu nuch churz chlä öppis über de
letscht HV
Dr 17, Januar 2026 isch ä dängwürdige Tag fürd Fraueturnerinne. Vorem Mittag hämmer möse i dr reformierte Chilche vum Hildi (Jg. 1952) Abschied ni. Es isch ganz uverhofft anere Hirnbluetig gstorbe isch. Mir sind jetz nuch gschockt.
Am spätere Namittag hät dr Thomi dä im "Bären" souverän und simultan d Hauptversammlige vu dä Turnerinne (wo mir Fraueturnerinne drbi sind) und dä Turner gleitet. 
Für üs erfreulich isch, as mr drü nüi Mitglieder (Gabriela, Renata und Corinne) händ. Ds Gisela hät nacheme churze Gaschtspiel dr Ustritt gih. Und mit üserer nüä Oberturneri Nadja startet mr topmotiviert its Turnjahr 2026. Ds Heidi, wo üs immer super bi dä Turnerinne verträte hät, isch zum Ehremitglied erkore worde. Härzliche Gratulaziu - häsch es tiptop gmacht. Ds Myrtha hät em meischte Turnstunde (42) bsuecht, ds Brigitte isch mit 39 Stund Zweiti worde und ds Ruth J. und ds Renate händs auf 37 Turnstunde bracht. Ds Myrtha isch zäme mit em Marianne B. 35 Jahr bi dä Turnerinne, ds Ruth J. 30 Jahr. Mir gratuliered allnä ganz härzli. Ä Dangg gaht au alli Kampfrichter/-inne, a J+S Coach Nadja und ad Sponsore und Gönner. 
Nachem Znacht isch dä d Fusionsversammlig -  ä vum Thomi gefüehrt - gsi. Meh über das chänd ihr dä uf dr gmeinsame Turn-Website www.tvnetstal.ch und i dr Zitig läse. Uf jedä Fall wünsched mir em nüä Vorstand, wos sicher am Afang nüd eifach hät, alls Gueti. 
Und tschüss, Käthi
PS: us Dateschutzgründ hani nu d Vornäme erwähnt und bi de Fotine nüd gschribe wer wer isch....

​
​Mir händ wieder guet gschaffet
Am viertä Apfänzsunntig hämmer wieder dörfe im Wiggispark Glüehwi usschänggä. Das git amigs chlä Gäld id Vereinskasse und its Reisekässeli vu dä Hälferinne. Alls isch eimal mi tiptop gloffe. Mir sind aber au afigs ä guets igspielts Team. Das Jahr händ s Regula und ihre Ma, ds Ruth, ds Marianne und dr Peter, ds Myrtha, ds Brigitte und Marita mitghulfe. Und natürli ds Käthi. Dem sinä Morged hät nuch spannend agfange. Will ds Parkhuus nuch zue gsi isch, häts ds Auto bim Coop-Restaurant-Iigang parkiert und zäme mit em Ruth dr ganz "Plunder" (Glüehwitopf und ä huffä Deko und Putzmittel etc.) zum Stand bi dr Rolltreppe treit. Zum das alls einigermasse schü ds lagere, hät ds Käthi nuch drü Poschti-Wägeli us der Tüüfgarage gholt oder ömel welle hole. Wos nämmli mit dä Wägeli wieder use hät welle, isch d Tür zuegsperrt gsi... Ds Ruth isch telifonisch nüt erreichbar gsi und was jetz? Käthi allein in der Garage... Zum Glügg häts dä dr Notusgang gfunde und isch dur ändlosi Stäge hinderem Burger King wieder ats Tagesliecht chu... I dr Zwüscheziit sind dä au de restliche Hälfer und Hälferinne itroffe und alls isch am Schnüerli gloffe. S hät relativ wenig Lüüt gka und au dr Leiter vom Coop-Restaurant - vu dem hämmer amix d Bächer - isch chlä truurig ummegstande. Aber nadisna häts dä glich nuch chlä Volgg gi. Uf jede Fall hämmer 39 Fläsche Glüehwii, füüf Fläsche Orangschä- und Öpfelpunsch und 10 Pagg Wiänachts-Chrämli brucht. Alls isch vum Coop im Uftrag vu dr Wiggispark-Mietervereinigung glieferet worde. Wills kä Gross-Asturm gi hät, hämmer ä chlä Ziit gka, mit üsernä Gescht ds plaudere. Danggä villmal dr Wiggispark-Mietervereinigung allne wo mitghulfe und mittrunggä händ. 

Ä ganz ä gmüätlichä Chlaushogg
Am 3. Dezember häts gheisse: "Legget üch warm a, mit lange Underhose usw." Folgsam wemer sind, hämmer das gmacht und üs im Volksgärtli Ennetbach troffe. Det isch es vrdächtig ruig gsi, ä wänn es paar vermuetet händ, as es det dr Apero git. Aber nei, nu ds Marianne N. vum Chlaus-OK isch chu und het gseit "So vu da a laufed mr." Dr super Apero isch dä im Chilchestübli gsi. De zwei andere vum OK, d Sarah H. und ds Barbi M. händ der profimässig vorbereitet. Mä hät nu möse luege, as mä nüd zvill vu allnä feine Sache probiert hät, s hät ja nuch Znacht gi.. Mit Fagglä usgrüschtet simmer dä witer zoge. Ds Grücht hät sich bewahrheitet. Ds Ziel isch d Mugi-Beiz gsi und d Beizerinne händ äs richhaltigs Raclette vorbereitet gka, wo ganz fein gsi isch. Langsam sind de lange Underhose fascht chlä läschtig gsi. Au d Organisatorinne i ihrne tolle Bikestopstation-Samichlaus-Jäggli händ roti Bäggli übrchu. Zum Glügg hät ds Rita Geburtstag gka und alli sind mit ihm veruse gu abchüelä und mit ämänä Cüpli gu astosse. Vor luuter Freud hät ds Rita dä alli Geträngg übernuh. Danggä villmal. Chunnt ächt nuch der Samichlaus? Fählalarm. Drfür hämmer noch zwei luschtige Spieli gmacht: Eis hät möse ufem Tamburin es vorgschribnigs Lied schlu und alli händ möse usäfinde, was es gsi isch. Bim zweite Spieli hät ds Sarah anärä Turneri ä Satz its Ohr gflüschteret, wo si dä a dr Tischnachbüri hät möse wiiterflüschtere. Zum Schluss isch dä chlä ä andere Satz usächu. Nach em feine Dessert - ä vum Chlaus-OK vorbereitet - sind dä de erschte ufä Heiwäg. Drü, nämmli ds Ruth L., ds Hildi P. und ds Heidi S., sind chlä nachdänggli gsi, wills nämmli dr nächscht Chlaushogg mönd organisierä. Mir freued üs druf und dangget em hürige OK und em Mugi-Beiz-Team ganz härzli für der schüü Abig. D Fotinä sind vu dr Regula M. Hät si ächt extra kä Lüüt i lange Underhose fotigrafiert?

Raclette-Stand am Chlausmärt
Am 29. November hät ds Regula eimal mi ä Gross-Iisatz gleischtet. Will jeweils nu vier Fraueturnerinne am Stand gsi sind, hät si schu vorher der Raclette-Chäs und ds Brot mösä schnidä. Ds Stand ufstelle hämmer we immer mehh oder weniger professionell gmeischteret. Ds Party-Zält, d Wiänachtsdeko und der Gas-Ofä vum Heidi händ drzue bitreit, as mrs ei Schüni gka händ. S einzig wo üs chlä truurig gstimmt hät, isch gsi, as viiiil zwenig Wärbig für der Märt gmacht worde isch und as es so wenig Ständ gka hät. Zerscht isch nüd so vill los gsi. Wo dä aber der Chlausumzug (vill Lüüt händ gfraget, wo der durägöch...) fertig gsi isch, hämmer gad chlä gschaffet. Dr Punsch (mit und uhni) und ds Raclette sind sehr gfraget gsi. Käs Wunder, ufem Generaziuneplatz, wo der Umzug gstartet und ä ufghört hät, häts ja nüt ds ässe und ds tringgä gi. Öppe am Abig am Achti simmer usverkauft gsi und händ blitzschnell alls wieder ufgruumet und versorget. Ds arm Regula hät sicher em Sunntig nuch ämal alls möse putze und tröchne. Wes dä ds nächscht Jahr wiitergaht gsämmer nuch. 

Cüpli-Stand im Wiggispark
Am Pfingscht-Samstig hät dr Wiggispark sis 30-Jahr-Jubiläum chänne fiere. Mir händ dörfe ä Cüpli.Stand füere und so wieder chlä Gäld id Vereinskasse bringe. Ds Käthi und ds Regula händ lang ghirnet, wes söled dr Stand dekoriere. Er hät dä schü usgseh - das vor allem will d Regula ihres Talent fürs Bluemä-Binde entdeckt hät. Prosecco, Orangesaft, Mineral und Snacks hät üs d Wiggispark-Mietervereinigung glieferet. S isch gad chlä öppis gloffe a dem rägnerische und gäge Abed ä nuch stürmische Tag. Aber alles hät tiptop klappet. Danggä villmal allne Hälferinne. 

​

FT- und MTV- Fit+Fun-Sieg am Verbandsturntag
Am 17. Mai isch im Buechholz ds Glaris dr Vrbandsturntag mit 1300 Teilnehmende gsi. Ä wänn üseri Fraue nach em Fit+Fun-Wettkampfisatz nuch nüd so gnau gwüsst händ we guet sie gsi sind, späteschtens nach em Rangverläse isch es klar gsi: Ds gmischt MTV-Team hät gwunne, s gmischt FT-Team ich zweit worde! S Training hät sich also glohnt. Härzlichi Gratulaziu. Und will der TV und TnV ä nuch d Fäschwirtschaft übernuh hät, sind ä det wider alli Wettkämpfer/-inne und nuch viel meh Fraueturnerinne im Iisatz gsi. Danggä villmal.

Muffins verteile im Wiggispark
Am Grüendunschtig hämmer im Uftrag vu dr Wiggispark-Mietervereinigung wieder dörfe Muffins  dr Chundschaft verschänggä. D Muffins hät d Glarner Feingebäck AG härgstellt und ds Käthi isch sie am Vorabig ds Engi gu abhole. Am andere Morged händ ds Ruth, ds Myrtha, dr Peter und s Käthi  nuch mit em Bostitch äs Oschtergruess-Schildli a alli Muffins gheftet. Drna hämmer sie im ganze Wiggispark verteilt. Will mr so schnäll mit verteile sind, häts nuch ä Poschtniwage voll Bio-Tortilla-Chips, Fitness-Stängel und Getränk zum Verschängge gi. Dangg derä "Muffins-Akziu" isch wieder chlä Gäld id Vereinskasse chu. Danggä Wiggispark-Mietervereinigung.
​
​

​Ä dänggwürdigi 95. Hauptvrsammlung
Am 18. Januar händ 24 Fraueturnerinne (FT) zäme mit dä Turnerinne (TnV) d HV gka. Schu lang drvor häts Frage und Diskussione gih, we das ächt zue und här göch mit der plante "Fusion" vu allne turnende Verein i ei Verein. Aber zerscht ämal hämmer fein gässe (Salat, Cordon-Bleu, Pommes und Gmües). A Viertelstund später as i der Iiladig hät dä d TnV-Präsidenti Sabrina Hefti ihri letscht HV eröffnet. Alli Traktanden sind logger über d Bühni gange, Jahresbricht, Jahresrächnig und Budget händ ja alli schu vorher per Mail übrchu. Ds redä hät einzig nuch gih, öb d Turnerinne äs Jahr lang uhni Präsidänti chänd sie. Sie chänd. Ab 2026 söttet ja dä alli Riege (Männli und Wiibli) nu nuch ei gmeinsame Vorstand ha. We das söll guh, hät dr Thomi Nef, jetzige Turnvereins-Präsi und bald GLTV-Präsi, so guet we mögli vrsuecht, ds erchläre. Im Grund gnu sind alli drmit iverstande und TnV und d FT händ mit drü Gägestimme bschlosse, de Fusiu so eifach we mögli ds erledige. Das chunnt schu guet. 
Guet sind au de Ehrige und d Uszeichnige über d Bühni gange (fascht alli i dr Fotogalerie). Vu üsernä zwei nüa FT-Mitglieder isch nu ds Anni awesend gsi - und au das nu halb, wills nuch glichzitig mit em Ruth S. im Service im Iisatz gsi isch. Das ander Nüümitglied, ds Gisela, hät sich entschuldiget gka. As nüüs Mitglied hämmer ds Ruth L. willkomme gheisse. Ds Ruth J. und ds Maya S. sind für 35 Jahr Mitgliedschaft geehrt worde, ds Heidi, ds Regula und ds Käthi für 10 Jahr. Au üsere Oberturner Peter und sini Stv. Nadja händ vum Heidi es Chüssli und es Gschängg übrcho. Ds Renate isch für 41 bsuechte Turnstunde geehrt worde, ds Myrtha isch 35 Mal gsi und ds Brigitte und ds Käthi 34 Mal. Ds Bea isch für ihre Isatz as Fit+Fun-Wettkampfleiteri beschänggt worde und de bedä Müllerinne fürd Organisaziu vum Chlausmärt- bzw. Wiggispark-Iisatz, wo chlä Gäld id Kasse bringt. Und jetz heissts dä wieder, ab its Turnä., damit mr dä fit fürd Fusiu sind. 

Glüehwiistand im Wiggispark
Am Sunntig, 22. Dezember, hämmer eimal meh dörfe im Uftrag vu dr Wiggispark-Mietervereinigung Glüehwii, Punsch und Chrämli verteile. We immer isch zerscht ächlä Hektik ufchu (d Feschtbängg sind uhni Stand det gstande...), aber das hät dä Crew 1 (Marianne, Myrtha, Regula, Ruth, Käthi)  souverän zäme mit em Stv.-Abwart glöst.  Bald ämal hämmer dä erschtä Wiggispark-Chunde chänne ä Becher Glüehwi usschänggä und gli isch es voll rund gloffe. D Regula hät dä nuch i allnä Gschäft Glüehwi verteilt. Über Mittag isch ds Ruth vum Brigitte abglöst worde. Em Namittag isch dä Crew 2 im Iisatz gsi (Christa, Elisabeth, Marita, Regula und Käthi). Zwüschetinä häts üs wägem Sturm verusse fascht dr Stand glüpft (isch zwar chlä übertriebe...). Es isch wieder alls tiptop gsi, dangge dr Wiggispark-Mietervereinigung, vor allem em Coop für de perfeggt Lieferig vu dä Äss- und Tringgware, em Coop Restaurant fürd Becher und der Luiza fürd Koordinaziu vu Chrüzlinge us. So hämmer üseri Fraueturn-Kasse wieder chlä chänne uffülle. Käthi

Ds Schnidbrättli isch der Hammer gsi
Für was mosmä ächt äs Schnidbrättli a Chlaushogg mitnih und wo anä gümmer? Am 4. Dezember händ üs dä d Organisatorinne (ds Rita, ds Marita und ds Ruth S.) de Frage beantwortet. Träffpunggt isch der "Stärne"-Garte gsi. Ds Wätter hät guet mitgmacht und  de 22 Fraueturnis sind mit Glüehwii, Punsch und Aperogebäck empfange worde. Und drna? Ischs nu es paar Schritt wiiter its Café Wiggis gange. Schu d Tischdekoraziu hät verrate, as da Künschtlerinne am Wärch gsi sind. Au ds Ässe (chlinä Salat und Gemüesspätzli mit oder uhni Fleisch hät allnä gmundet). Zum Dessert häts Schoggimousse, Tiramisu und Öpfelchueche gih. Dr Höhepunggt sind aber eidütig em Rita sini raffiniertä Spieli gsi, wo ds Hirni und d Motorik gad ächlä usägforderet händ. Gruppäwiis hämmer möse Chrüzworträtsel, Sudoko und nuch vill meh löse. Und jetz hämmer ä gwüsst, werum  mr händ müesse es Chuchibrättli mitnih. D Ufgabe isch gsi, ds Brättli mit ämene Blatt druf ufä Chopf ds tue und z.B. ä Esel mit gnaue Agabe ds zeichne. "Das war der Hammer, wir haben uns ja beinahe totgelacht," isch dr Marita ihrä Kommentar gsi. D Siegerinne händ ä Gschängg-Guetschi fürd Stärne-Bar übrchu. Eimal meh hämmer würggli ganz ä tolle Chlaushogg gka, danggä villmal dä Organisatorinne. Ds nächschtjährig Chlausteam mit em Marianne N., em Sarah und em Barbi isch dä gad ächlä gforderet... D Fotinä händ üseri Hoffotografin Regula und s Ruth S. knipst.   

Raclettestand am Chlausmärt
Am 30. November hämmer am chlinä Chlausmärt ufem Schuelhuusplatz wieder Raclette abottä. Ds Regula und ihre Ma händ eimal mi perfeggti Vorarbeit gleischtet und d Hälferfraue (Lisbeth, Marita, Renate, Käthi) händ wagger bim Ufbuu vum Stand gholfe. Alles hämmer perfeggt gschafft. Wills so chüel gsi isch, hämmer ä super Gasofä gka, wo so guet gsi isch, as er sogar em Lisbeth sini Hose zum Schmelzä bracht hät. Mir händ aber nuch mih gschmulze: superfeins Raclette mit vum Käthi chlä freestyle-mässig gschnittnem Brot und ä Huffä Biilage. Zerscht isch es nüd so guet gloffe, aber nach em Umzug (leider hämmer vu dem nüt gseh) simmer dä fascht überrännt worde. Doch mit es paar loggere Sprüch hämmer alli Bsuecher guet chänne vertröschte. Ghulfe hät da sicher ä nuch der Eierlikör, womer aber (fascht) nu für zum üs Ufwärme brucht händ. Schü isch au gsi, as gad es paar Fraueturnerinne üs es Bsüechli abgstattet händ.  

As VIP am Super10Kampf im Hallestadion 
Am Vorabig vor Allerheilige het ä WhatsApp-Mäldig vum Heidi nuch chlä für Urueh gsorget. Will mr ja Silber VIP-Charte fürä Super10Kampf gka händ, isch as Dresscode "Smart Casual" empfohle worde. Was das heisst hät üs ds Heidi ä gad nuch mitteilt: Kä Jeans, kä Sneakers, ehnder äs Blüsli und Pumps... Jedes hät dä ds Bescht drus gmacht und alli 25 Fraue und der Peter händ proper usgseh. Im Hallestadion häts ds erscht ä Füehrig mit em Reto Caviezel gih - mir sind eifach eimal Backstage umds Hallestadion gloffe und händ gseh, was im Hintergrund so alls lauft. Drna hämmer es chlises Päusli gka, bevor mr imänä separate Ruum üsere VIP-Steh-Apéro gnosse händ. Isch super fein gsi, Leider häts nu Bier/Mineral zum Tringgä gih und kä Wi oder Cüpli. Jänu. Drfür hämmer dä uf üserne VIP-Plätz ds ganze Stadion im Bligg gka. Zäme mit 11'974 anderne Fans hämmer de dr ganz Super10Kampf mit allnä Gladiator*inne lutstarch und mit Plastik-Chlepfnudlä unterstützt. Mir händ vorallem möse de gälb Gruppe mit Coach Heinz Frei, Angelica Moser, Mathilde Gremaud, Matthias Kyburz und Nicolas Huber afürä. De händ de zletscht ä nuch gwunnä! Aber ä dr Simon Ehammer und dr Andri Ragettli händ üs mit ihrnä Tricks begeischteret. Meh vrzellet mr nüd, am 23. November chunnt dä dr ganz Super10Kampf uf SRF1 im Fernseh. Moderiert händ dr Sascha Ruefer und  d Jennifer Bosshard, Schiedsrichter isch dr Franco Marvulli gsi. Als "The Gladiator 2024" häts Publikum dr Andri Ragettli gwählt.
Isch ä super Alass gsi, danggä em Heidi fürs Organisiere und nuch öppis: Das mit em Dresscode händ dä lang nüd alli Lüüt  i üserer VIP-Loge ighalte ;-)

Ä s bummsvolls Raclettestübli am Dorffäscht
Am Dorffäscht vum 21. und 22. September hämmer zäme mit em Manneturnverein im Foyer vu dr Mehrzweckhalle Raclette, Chüeche und viel z tringgä vrchauft. Dr Uwe und ds Heidi händ das perfeggt organisiert - eifach ds nächscht Mal nuch a d Fläsche- und Büchseöffner dängge ;-) - aber ä das hämmer drna ä voll im Griff gka. Dangg all denä viele Hälfer:inne isch ä bednä Täg alls tiptop gloffe. So guet, as mr nüd ämal Ziit gfundä händ, Fotinä vum übervolle Raclettestübli z mache. Uf jede Fall isch es wieder ä tolle Iisatz gsi - und s Wettnagle isch bi Jung und Alt superguet achu. 

​Lappi tue d' Augen uf
Erwartigsvoll simmer am 31. Auguscht am früenä Morged i Zug igstiege und schu bald ämal hät mä im ganze Bahnwage gkört, as ds Fraueturne Netschtel unterwägs uf Schaffhuse isch. Ds Nadja und ds Renate händ ä super Usflug für üs vorbereitet. Ä wer googlet hät, hät nüd gnau usegfunde, was es mit em "Foodtrail", anere gnussvolle Schnitzeljagd, uf sich hät. Wer hett bim Kafi und Gipfeli Müller Beck dänggt, as mr bald ämal vier Stund lang gruppäwiis i der Vorstadt; Neustadt und  Oberstadt ummäirret und hirned. Eigentli isch es ganz simpel. Mä fassed bim Schaffhuserland-Tourismus ä grüeni Täsche mit ämene Stadtplan und emene Infoblatt und suecht, dä dr Ort wos äs Rätsel ds löse isch. Da heisst öppe "gehe zum Haus zum Ritter" und id Gass wo glich heisst, we wää ämene Ross d ... git.  Das isch nuch liächt gsi. Ä durs Polizi-Gebäude durelaufe. Nu ei Gruppe hät Bekanntschaft mit der Polizi gschlosse. Bim Mohrejoggeli-Brunne hät mä ä Hiwiis übrchu, wo ds erscht Ziil  isch: bim Chäs Marili, wo mr händ chänne verschiedeni Chääs und Birebrot probiere. De zweit Ufgabe hämmer möse mit Hilf vu Piktogramms löse. Zum Glügg sind de Iheimische sehr hilfsbereit gsi und händ gäre Uskunft gi. Allerdings händ nüd alli gwüsst, um was es gaht. Uf jede Fall het de letscht gstartet Gruppe bi dem Ort schu de zweitletscht Gruppe igholt... Diä händ  dä halt per QR-Code Hilf agforderet und sind so - und mit Kameradinne-Hilf - usem Chrüzgang chu. Will de letscht Gruppe dä bim nächschte Poschte wägem farbige Huus fascht vrzwiflet isch und dä wieder vu dr zweitletschte igholt worde isch, händs ä Fusio bschlosse. Gmeinsam hät mä dä d Schaffhuser Riesling-Suppe - isch sehr fein gsi - im "Güeterhof" gnosse und de witer Strategie usgheckt. Drna händs em Munot ä Churzbsuech abgstattet, bevors s nächscht Ziel avisiert worde isch. D Fusionsgruppe isch dä nuch inä Klima-Demonstraziu chu, händ aber dä ds Ziel PeperOhni schnäll gfunde. Det häts Knäckebrot mit vrschiednä Ufstrich und ä lehrriche Gang ufs WC gi. Dr nächscht Hiwiis-Punggt isch s bekannt Tor mit em Spruch "Lappi tue d'Augen uf" gsi. Vu det us hämmer dr Chopf i Himmel gstreggt und all de vorgschriebne Erker - si gitt 171 ds Schaffhuse - gsuecht. Nuch meh gsuecht hämmer dä dr achteggig Brunne, wo üs zunere Süessigkeit het sölle leite. Plötzli isch "Läderach" gstande, aso det inä, aber Fählazeig. Nu ei Gruppe hät sich gwaget, ä det es Probiererli ds hole. Ds Ziel wär d Confiserie Reber mit dä Schaffhuser Züngli gsi... Zletscht hämmer nuch möse äs Lösigswort usegfinde, zum im Kronenhof,  em Ziel vu denere Schnitzeljagd ds lande. As Belohnig häts es Falkenbier oder es Panasche gi. Gmeinsam sind dä alli Gruppe wieder a Startpunkt und ds Nadja und ds Renate sind gottefroh gsi, as alli heil itroffe sind. Gmüetli simmer dä ufä Bahnhof und mit em Zug a Rheinfall gfahre. Det hät üs dr näbscht em Wasserfall ä feine Pastaplausch im Restaurant Park erwartet. D Serviertochter Chantal isch hell begeischteret gsi vu üs - und mir vu ihre!
Nachem obligate Gruppeföteli simmer wieder ufä Bahnhof tschalpet, die Müedere händ dr Lift gnu. Churz nach em Zächni simmer ds Netschtel itroffe. Dr Vorschlag, nuch ad Ännädaner Chilbi ds guh, hämer i Abetracht vu üserem Alter abglehnt. Danggä villmal Nadja und Renate, isch ä super Usflug gsi und mir händ nüd ämal möse em Jacky teliefoniere.

Trigonella-Spiele statt Minigolf 
I dr letschte Turnstund vor dr Summerferi hämmer welle i Horgeberg gu Minigolf spiele. Wills aber meineid gwitterhaft gsi isch, hät d Regula churz entschlosse ds Programm umgstellt und ä Spieli-Abed im Trigonella organisiert. Zächä Fraue und vier Manne händ dä im zerscht vollbsetzte Trigonella gjasset, Rummikub, Brändi Dog, Mühli oder Dame gspielt. Es isch ä gmüetliche Abig gsi, alli händs gnosse und die eint oder ander hät nuch es Dessert oder ä Pizza bstellt. 
​Danggä Regula, isch ä super Idee gsi. 

Schaltflächentext

​Netschteler Sieg am Bügla 2024

​Trotz em Rägewätter händ  d Netschteler ds Domat-Ems ä volle Isatz zeiget und bim Vereinswettkampf Männer/Frauen 3-teilig gwunne. Schad isch nu, as si de einzige i dener Kategorie gsi sind. Aber da händs ja nüt drfür chänne. Sieg isch Sieg und drum ganz härzlichi Gratulazio. Vielä Dangg au ä dä wätterfeschte Fraueturnerinne wo voll für ihres Team gfänet händ. 
D Fotos sind übrigens vum Regula Müller und vum Peter Nef.

Schaltflächentext

FT/MTV im dritte Rang bim Fit and Fun
Am 25. Mai isch ds Glaris dr Vrbandsturntag gsi. Die jüngere vu dä Fraueturnerinne händ zäme mit dä Männerturner wagger güebt und so dr dritt Rang usägholt. Üsere Oberturner, dr Peter, isch gläb zfriede gsi, er hät ömel uf WhatsApp geschriebe: "Super gmacht und viele Dangg dä Supporterinne." 

Muffins-Verteile im Wiggispark
S isch schu bald Tradiziu, as mr am Oschtersamschtig dörfet im Uftrag vu dr Wiggispark-Mieter-Vereinigung Muffins verteile. D Muffins lieferet üs der Uwe vu der Feinbäckerei Engi. Mir mönd dä amigs nu nuch d Oschterwünsch-Schildli amache und chännd dä ufd Lüüt los. Fascht alli nänd gärä sonäs Chüechli, bedangget sich härzli und wünsched frohi Oschtere. S gaht amigs nu öppe ä Stund bis alli 700 Muffins verteilt sind. Danggä villmal em Wiggispark und dä Fraueturn.Hälferinne. So hämmer wieder chlä öppis id FT-Kasse.

94. Hauptversammlig vum Turnerinneverein am 20. Januar
D Präsidenti Sabrina Heft hät chänne 37 Turnerinne (drvu 21 Fraueturnerinne) im Bäre zur HV begrüsse. Zerscht händ sich de meischte mit emänä grosse Znacht (Salat,Cordon Bleu, Pommes und Gmües) gstärcht. Ds Wichtigscht für d Fraueturnerinne: mit händ dörfe drü nüi Mitglieder begrüesse: Ds Sarah Hunold, ds Daniela Tietz und ds Patrizia Villiger. Härzli willkomme. Dr Ustritt hät ds Daniela Gallati gi. D Jahresrächnige, das Jahresprogramm etc. sind  meh oder weniger diskussionslos über d Bühni gange. Drna häts  gad ächlä Ehrigä gih: 25-Jahr Mitgliedschaft für ds Priska Geyer und ds Christa Leuzinger und 10-Jahr-Mitgliedschaft für ds Marianne Nef. Am flissigschte isch ds Käthi Müller mit 48 Turnstunde und Hälfer-Isätz gsi, gfolgt vum Myrtha Nobs (42) und em Brigitte Weber (37). Witer sind geehrt worde: dr Peter Nef as Kampfrichter und Oberturner, ds Nadja Steiner als stv. Oberturneri und Protokoll-Füehreri, ds Bea Schnyder als Fit+Fun Wettkampfrichteri, ds Regula Müller als Organisatori vum Chilbi-Iisatz und em Chlausmärt-Stand und ds Käthi Müller fürd Wiggispark-Akziune "Muffins verteile am Oschtersamschtig" und "Glüehwiistand bim Sunntigsverkauf" im Dezember. 
Intressant isch es worde, wo d Präsidenti mitteilt hät, dass es ä Arbetsgruppe i dem Jahr sött schaffe, alli turnende Verein under eim Dach ds vereine, das heisst es würd dä ä Vorstand gih, wo über allne bis jetz meh oder weniger selbständige Riege (z.B. Turnerinne, Turner, Fraueturne, Manneturne, Jugis, Elki etc.) staht. So chänntet Synergiä gnutzt wärde. Als Verträterinnä vum Fraueturne wärdet ds Heidi Süess, ds Nadja Steiner und ds Käthi Müller i dr Arbeitsgruppe mitmache. D Riege wärdet nach jeder Sitzig  gmeinsam informiert. Zum Schluss hät ds Myrtha Nobs nuch chlä Wärbig fürd Turnveterane und -inne gmacht. Alli über 50 sind härzli willkomme. Nach dem Turnerinnelied händ sich de fascht alli nuch mit ämänä Dessert etc. gstärcht.

Zweimal uf de gross Foti drugge, dran "play" dä sött d Fotoshow ablaufe. D Fotos sind vum Regula und vum Sarah.

Glüehwiistand im Wiggispark
Am dritte Advents-Sunntig hämmer wieder dörfe im Auftrag vum Wiggispark Glüehwii, Punsch und Chrämli verteile. Schu am Morged am Zächni händ ds Marianne, ds Myrtha, dr Peter, ds Regula und ds Käthi der Stand bi dr Rollträppe wiänächtlich gschmüggt. Alls isch tiptop gange und mir sind parat gsi - bis der Glüehwichocher nümmä gkochet hät. Alles Kabel umhänggä hät nüd gnützt, drum isch dä dr Peter sinä Glüehwiichocher guh hole... Vum ölfi bis em Abig em sächsi hämmer 40 Fläsche Glüehwii und siebä Fläsche Punsch (Rum, Orange und Öpfel) verteilt. Drzue häts nuch Chrämli gih. Dangg dä Fäschtbängg und emenä Gartetisch vom Coop Restaurnat händ d Lüüt ä nuch chänne chlä högglä. Am Nami händ dä ds Marita und ds Trix ds Marianne und Myrtha ersetzt. Trotz em schünä Wätter häts ordäli Lüüt gka. Danggä villmal em Wiggispark und dr Organisatori Käthi samt ihrne flissige Hälfer/-inne. 

​Ch​laushogg underem Pfarrer
Ds Chlausteam 23 mit em Bea, Brigitte, Christa und Nadja hät sich öppis ganz Bsunderigs ifalle luh. Weles Lokal händs ächt für 19 Persune usgsuecht???? Träffpunggt und Apéro isch i dr Sternen Bar gsi. Jedes hät möse ä Jass-Charte zieh und so sind vier Teams entstande: "Rotchäppli", "drü Fragezeiche", "Schälle-Ursli" und "King Kong". Gmeinsam hämmer üs dä ufä churze Wäg gmacht. Wohi? I de katholisch Underchilche. Das Chlausteam hät super dekoriert und d Pizzaöfeli sind vorgwärmt gsi. Mit usgwalltem Teig und verschiednä Zuetate händ alli chännä ihri Lieblings-Pizza kreiere und imene Pfännli brätle. Salat häts ä nuch gi - as Turnerin läbt frau ja xund. Nach em Ässe häts OK ufgruumt und de verschiednä Teams händ möse us dä Biildli vu zwe Würfel ä Gschicht erfinde und vorläse. Isch nuch spannend gsi, was da so zämegstieflet worde isch. Drna hät nuch eis vu jeder Gruppe möse mit vrbundne Auge dr Name vum Team ufänä Fliptschart zeichne. All händ das tiptop gmeischteret. Zum Dessert häts megafeini warmi Waffle mit Glace, Frucht-Ufstrich und vielem meh gih. All händ d Büüch voll gka. Ds Chlausteam hät das hervorragend und günschtig gmeischteret. Danggä villmal, Mir sind jetz schu gspannt, was s  Chlausteam 24 mit dr Marita, Rita und Ruth ds nächscht Jahr macht. 

Raclette am Chlausmärt
​S hät schüü gschniiälät am Chlausmärt vom 2. Dezember 2023. Weniger schüü isch gsi, as mr uralti Marktständ übrchu händ, wils de nüä ds Glaris am Märt bruucht händ. Drzue isch chu, as dr Stand viär Meter lang gsi isch, und mr drum der schü heimelig Pavillon nüd händ chänne ufstelle. Aso hämmer mit Kabelbinder, Spannsets, Plastikblache und Bostitch improvisiert und ä d Dekoraziuu isch am Schluss perfekt gsi. D Regula häts voll im Griff gka, aber isch schu chlä am Aschlag gsi.  Ds Raclette schmelze, Rum-/Orange-Punsch und Fraue-Wunsch-Punsch usschänggä hät drfür beschtens gklappet und d Lüüt sind glüggli gsi. Schad isch, as es nu füüf Ständ, ä Imbisswage und s Turnerinne-Beizli im Foyer gka hät. Aber mir händs mit Humor gnu. Härzliche Dangg a dr Obrchrampferi Regula und ihrnä Hälferinne und Hälfer. 

Gross-Isatz bim Dorffäscht
Am 22./23. September isch im Ahang a Chrüzmärt ds Dorffäscht - früner häts Chilbi gheisse - gsi. D Fraueturnerinne händ zäme mit dä Manneturner im Foyer vu der Mehrzweckhalle es Raclette-Stübli samt Kaffi, Chueche und Wettnagle gfüehrt. S isch viiiiil besser gloffe as ds letscht Jahr, womer wiit ab vum Gschütz es Fäschtzält gha händ. Uf jede Fall hämmer am Samstig nuch spontan mih Chäs und Biilage mösse go poschtnä. Und gäged dr Abed häts nüd ämal meh für alle Lüüt Platz gha - ä wämmer nuch ä Tisch meh inägstellt händ. Ds Wettnagle isch für ä Huuffä Chind und ä für muetigi Erwachseni ä willkommeni und günschtigi Abwächslig gsi. Danggä villmal em OK, de flissige Hälferinne und dä versierte Chuechebacherinne.

​Stafettenabend im Buchholz
Bim Stafette-Abig am 1. September sind d Fraueturnerinne und der Manneturnverein undr der Leitig vum Roger und vum Heidi u.a. fürd Fäschtwirtschaft  im Iisatz gsi. S hät gad chlä z tue gi, all de Würscht, Pommes, Schnitzelbrot, Hot-Dogs, Geträngg und Chüechä ds vorzbereite und ds vrchaufe. 

​Minigolf im Horgenberg
Statt turned hämmer am letschte Mittwuch vor dä Summerferiä g'minigölflet. We immer sind au dr Männerturnverein und d Turnerinne iglade worde.  Vu dä Turnerinne isch nu gad ds Patrizia chu, bi dä Manne händs sächs gwaget. Vu de 20 Teilnehmende sind öppe d Hälfti mit em Velo i Horgeberg und de ander Hälfti mit zwei Privatautos gfahre. Alli händ der lau Summerabig mit Schläger, Bälleli und vill Spass gnossä. De einte händ sich ä Taktik zwäggleit gka ("det bim wissä Rand moss der Ball bim erschte Schlag anä" usw.), de andere händ eifach munter druflosgspielt. Drna simmer id Gartewirtschaft. De verspielte Kalorie hämmer logger wieder inägholt.
Da nuch de erschte füüf uf dr Ranglischte: 1. Roger Z, 2. Ralph B., 3. Ruth J., 4. Heidi S. und 5. Rita B. Härzliche Gratulaziu und härzliche Dangg em Nadja fürd Organisaziu.

Usflug uf Lindau
15 Fraue und 1 Ma (dr Oberturner) sind am 24. Juni meh oder weniger pünggtli am Bahnhof gstande und händ schü brav zuegloset, was üs de bedä Organisatorinne Regula und Marianne vrzellt händ. De günschtige Ostwind-Tagescharte sind schu alli glöst und bi jederä (sorry Peter) uf em Smartphone gsi. Aso nüt we los mit em Zug durä Ricke Richtig Bodesee! Ds Rorschach hämmer üs mit Kaffi und Gipfeli gstärcht und drna hämmer üs zwüsched all de Velofahrer ufs Schiff durägschlänglet. Schü gmüetli und mit ämä laue Lüftli im Gsicht simmer dä nachere Stund ds Lindau achu. S isch schu Ziit fürs Zmittag gsi und alli händ i dr Gartewirtschaft äs schüüs Plätzli samt Uusichtig ufä Bodesee gfunde. De feine Drinks sind üs natürli sofort its Aug gstoche. Bim Ässe händ sich de meischte für Flammchueche oder Fischchnuschperli entschiede. Drna sind grüppliwiis d Altstadt und natürli d Chleiderläde erkundet worde. De eint oder ander hät öppis Passends gfunde. Wills immer heisser worde isch hämmer üs dä alli wieder bim Glace-Stand troffe. Gli schu isch s Schiff chu und hät üs wieder id Schwiiz zruggbracht.. Ä chlä Ufregig häts nuch gi, will mr nüd gwüsst händ öb mr mösed ufä Zug sprinte oder was, Mir sind dä gmüetli ufä Bahnhof zrugg gloffä und glüggli wieder im richtige Zug mit dä reservierte Plätz gsi. Und ds Netschtel händ diä einte nuch ä Abstächer i Bäre gmacht, wills schu wieder Durscht gha händ... Isch schü gsi, danggä villmal dä Organisatorinne.

Rang zwei für üsers Fit&Fun-Team am Verbandsturntag
Am Samschtig, 21. Mai, isch ds Niederurne dr Verbandsturntag durägfüehrt worde. Üsers Fit&Fun-Team, aso ä chlä de jüngere Fraueturnerinne und dr Männerturnturnverein händ i dr Fit&Fun Disziplin alls gih und sind Zweite vu sächs Teams worde. Nu dr Damäturnverein Näfels isch nuch besser gsi.
Zeitungsbericht

Äs nüüs Tenü für alli
S erscht Mal i dr Gschicht vu dä turnende Netschteler/-inne händ alli Riege ds gliich Tenü. D Sabrina Hefti (Präsidänti vu de Turnerinne) hät fascht im Alleigang drfür gsorgt, as  125 Erwachsni und 40 Chind einheitlich agleit sind. Dangge villmal Sabrina und dangge au dä Sponsore: Kalkfabrik Netstal, Auto Sauter, Hoflädeli Mettlä, Sanitär Kubli, Restaurant Bären und A. & J. Stöckli AG.
Bericht glarus24
Zeitungsbericht Fridolin

Ostermuffins im Wiggispark 
Im Uftrag vu dr Wiggispark Mietervereinigung hämmer am Oschtersamschtig wieder chänne Muffins verteile. Dr Uwe vu der Glarner Feingebäck AG hät üs 700 feini Muffins bache, vrziert und i Cellophan abpackt. Ds Marita, Ruth, Trix und Käthi händ dä nuch mit farbige Bürochlammere d Schildi dra ghänkt und sind  punkt Zächni im ganze Wiggispark gu de Muffins verteile. (Fascht) alli Chundä händ meineid Freud gha und sich ä ganz härzli bedanggt. Ä ds Fraueturne möcht sich bi der Mietervereinigung ganz härzli bedangge. Das git ä schünä Zuestupf id Vereinskasse.
Vor em Mittag bis am Abig hämmer nuch ä andere Uftrag, jetzt vum "Büro für Ereignisse", chänne übernih: ä Früehligs-Apéro samt Minigolf für Kids. Ds Marianne hät mit em Anoi dä Lüüt alkoholfriä Holderblüetä "Hugo" und 0%ige Eierlikör, Wiss- und Rotwii oder Prosecco usgschänggt und ä Ziit gka, nuch chlä mit dä Lüüt ds pläuderle. Dr Peter und drna s Käthi händ d mini Minigolf fürd Chind betrüüt. Alli wu meh oder weniger troffe händ, sind mit ämä Lindt Schoggi-Häsli belohnt worde. Au em "Büro für Ereignisse" möchtet mr härzli danggä. Mir sind gärä bereit, wiiteri Ufträg ds erfülle ;-)

​Bea und Peter im FK
Kürzlich haben Bea und Peter den Fortbildungskurs als Fit+Fun-Richter besucht. Hier ein paar Fotos, damit ihr jetzt schon wisst, was uns in den nächsten Turnstunden erwartet.
Zeitungsbericht Fridolin

.Ä gmüetlichi Hauptversammlig
Am Samstig, 21. Januar, isch de 93. ordentlich Hauptversammlig vum Turnerinneverein, wo ä ds Fraueturne drzue ghört,  über d Bühni gange. D Präsidänti Sabrina Hefti hät dörfe 16 Fraueturnerinne und 16 Turnerinne begrüesse. Alli Traktande sind problemlos abghandlet worde.
Ds Marita und ds Lisa sind für 45 Jahr Mitgliedschaft geehrt worde. Ds Myrtha hät im 2022 am meischte Turnstunde bsuecht, ds Bea und ds Käthi am zweitmeischte. Ä bsundere Dangg verdiänät händ dr  Peter (Oberturner), ds Regula (Event-Managerin), ds Nadja (Ersatz-Oberturneri), ds Bea (Wertigsrichteri), ds Conny (Buechhaltig) und ds Käthi (Webmasteri). Und natürli nüd vrgässe ds Priska (Revisori und mit ämä wachsame Aug für alls Möglichs).
Meh über d HV findet ihr dä bald ämal uf dener Website.
Ufgschaltet isch dr Ziitigsbricht schu uf glarus24.ch
Bi dä Fotinä und ufs grosse Bild tippe und drna uf "Play".

Dr Chalchi-Chlaus isch chu
Us der Usschribig hät mä nüd so rächt gwüsst, was am Chlaushogg passiert. Uns so hämmer üs am 7. Dezember bim Bahnhof troffe (alli mit ämä Gschängg samt roter Schlaufe). Ds Heidi und der Peter (diä vum OK, nüd diä vu dä Geisse) sind dä mit üs losmarschiert. Hinder dr Chalchi häts us ärä Füürschale gfungget. Bim Nächerchu hämmer gseh, as de zwei restliche OK-Mitglieder, ds Myrtha und ds Ruth J., am Chöchälä gsi sind. Drnäbed isch dr Chalchi-Chlaus gstande und hät üs härzli begrüesst. Drna hämmer dörfe dr fein Öpfel-Glüeh-Punsch samt Gebäck i Form vumänä Chrischtbaum gnüsse. Drna isch dr Waggel witergange. Wo gümmer ächt hi? Im Buechholz isch dä klar gsi: entweder ids Curlinghalle-Beizli oder ids Stübli vu dr GLKB-Arena (Kunschtiisbahn). Das letscht hät dä gstummä. Womer dä so schü ghögglet sind, hät s Priska gmerggt, as sini Handtäsche niened me ummä isch. D Chlaus isch dä so nett gsi und häts mit em Auto uf Netschtel gfahre. S isch meineid lang gange, bis de bedä samt Täschli wieder chu sind. Dä hät der Chlaus es paar Fraue usäzupft und ganz nett mit ihnä gredt. Det händs nuch nüd gwüsst, as genau sie ds nächscht Jahr mönd/dörfed dr Chlaushogg organisiere.... Bald isch Ziit für ds Znacht gsi: gmischte Salat, Hackbrate mit Gmües und Härdöpfelstogg, Tiramisu. Frisch gstärggt hämmer üs dä ads obligat Würfelspiel gmacht. Je nach Würfelzahl hät mä chännä eis vu de Gschänggli hole, ds Gschängg witergi oder ämäne andere stähle. D Sögg und der Biberflade sind am begehrteschtä gsi... Nahdiesnah sind dä de erschte, wo nuch nüd im Pensionsalter sind, ufbroche und Richtig Netschtel marschiert. De andere sind nuch chlä ghögglet. Isch richtig schü und gemüetli gsi. Härzliche Dangg em OK.
​
​
​Raclette am Chlausmärt
Am 26. November händ s Regula und ihres Team wieder gwürggt. Ab em halbi drü isch dr Stand ufem Schuelhuusplatz ufgstellt und iigrichtet worde. We immer häts chlä z studierä gih bis alls am richtige Ort gsi isch (sogar d Lampe wo dr Stand belüchtet hät). Ab em Vieri isch dä dr Punsch- und Racletteverchauf losgange. D FT-Chlausfraue händ sogar nuch ä nüi Punsch-Versiu kreiiert: Orangschä-Punsch mit Rum. Isch imfall megafein. Ds Team studiert immer nuch amänä tolle Name ummä. So öppis mit Turnen und Frau... Der "Fraue-Wunsch-Punsch" ist sehr guet gloffe! Bim Raclette häts zerscht chlä gharzet, aber bis em halbi Achti händ dä immer meh Lüüt Raclette uf Brot wellä. Drna ischs dä wieder ads Ab- und Ufruumä gange. Danggä Regula fürd Organisaziu und allnä für ihre Iisatz.

Dr Turnstand vom 2. November isch super gsi
Zerscht hämmer im Hot Wok (ehem. Bahnhöfli) feini asiatischi Sache gässe und pünggtli am Achti hät s Heidi Süess dr Turnstand mit villnä Dankeswort a alli Hälferinne eröffnet. Aber dr gröscht Dangg hät eigentli ds Heidi verdienet! Awesend sind 16 wiiblichi und ei männliche FT gsi. Mir händ ds Jahresprogramm und d Jahresrächnig samt Bütsche gnehmiget und em Vorschlag, nü Passivmitglieder ufznie, zuegstimmt. Drna isch nuch das obligatorisch Lotto durägfüehrt worde und am Schluss sind alli glüggli (viellecht au wägem vom Hot Wok offerierte Schnäpsli) heigange. 

Ä Usflug mit Klatsch, Kathedrale und Kauderwelsch
Am 1. Oktober hämmer mit em Heidi dörfe sini Stadt aluege. Gnauer gseit, isch es üsere Usflug gsi. 10 Fraue sind mit em Zug uf Chur, dä uf ämä chlinä Umwäg its Kaffeeklatsch (i dr alte Post) und händ sich mit Kaffi, Gipfeli oder Pancakes gstärcht. Drna hät üs ä Churer Stadtfüereri d Altstadt zeigt und ganz ä Huffä Interessants erchlärt. Chur isch eini vu de älteschte Städt i dr Schwiiz, Usgrabige händ zeigt, as schu i dr Jungsteiziit (vor Christus) Lüüt det ghuuset händ. Später isch es ä wichtige Handelsort worde. Es paarmal isch Chur abäbrännt. Mir wüssed jetz au, werum as ds Bündner Kunstmuseum nüd agschriebe isch (will d Bündner Bevölkerig, nachdem es nu uf dütsch agschriebe gsi isch, au ä romanischi und italienischi Versiu händ welle - das hät aber kä Platz gha und drum händs ds dütsch Logo ä gad wiedr abmontiert). Und was de drü wissä Böllä ufem Alexanderplatz bedütet (3 Lotus vum Engadiner Künstler Not Vital). Ä «Langer Weg» und d Süsswinkelgasse sind für üs kä Främdwörter mi. Sogar ds ältescht Huus und ä huffä chlini Gässli känned. Und «Kauderwelsch» söll us «Chur» und «Welsch» (romanisch) entstande si. Idrüggli isch d Kathedrale St. Mariä Himmelfahrt, wo umänä Fels umäbuut worde isch. Mir sind gli wieder usä, will einä mit em Staubsuuger ghantiert hät. Dr Sitz vum Bischof Bonnemain isch vu ussä nüt bsunders gsi, inne möses aber ganz schü si. Wämä dä vu dr Altstadt abelauft, chunnt mä durnäs gmuurets Tor, wo de Reformierte vu de Katholische trännt. Natürli hämmer ä nuch de reformiert Martinskilche aglueget und dä langsam Hunger überchu. Zum Glügg simmer bald im Rasthaus Gansplatz gsi und händ ä gmischte Salat, es Cordon-Bleu, (dr Alpchäs isch we bimänä Dammbruch ausägloffe), Gmües und Pommfrits gnosse. Ds Desser, Öpfelsorbet mit suurem Moscht, isch knapp nuch abä gange.
Nachämä churzä Spaziergang simmer zur nächschte Füerig, isch zwar eher ä Sitzig imänä Chäller gsi. Mir händ erfahre wemä «Churer Röteli» macht und as es im Momänt schwierig isch, alli Zuetate und vor allem Glas-Fläsche übrzchu. Für üs häts aber noch glanget und mir händ dörfe degustiere.
Drna sind alli hudelum gsi, Zumänä Kaffi oder Teeli häts dä doch nuch glanget, bevor mr wieder i Zug inä und hei sind. Isch schü und gmüetli gsi, danggä Heidi.
PS: de chlinä Fotinä undä atippe, dä wärdets grösser. 

​FT/MTV am Dorffäscht im Isatz
Am Fritig/Samstig, 16./17. September, isch ds Netschtel statt änere Chilbi äs Dorffäscht gsi. I verschiedene Fäschtzält isch gässe und gfäschtet worde. Ds Fraueturnä (FT) hät zäme mit em Manneturnverein (MTV) äs Zält (mit Musig und Heizig) zhinderscht bim Generaziuneplatz gha. D Manne händ Raclette abotte. Das isch bi dem chüele und rägnerische Wätter rächt guet gloffe. D Fraue händ Sandwich mit "Wunschinhalt" verchauft, das isch weniger achu, aber ä Versuech wärt gsi. Dr Getränkeabsatz und ds Nagle händ öppe dä Vorstellige vum OK entsproche. Danggä em Regula und ihrnä Hälferinne für der gross Isatz. Isch gwaltig gsi. 

​Minigolf Horgenberg
Trotz em chlä usichere Wätter hät ds Nadja ds Minigölfle agseit. Es isch ja schu fascht Tradiziu, as mä am erschte Mittwuch nach dä Summerferiä gaht gu Minigolf spiele und ä nuch d Turnerinne und d Herrä vum MTV iladt. 9 Fraueturnerinne, 3 Turnerinne und 1 MTVler händ dr Golfschlegel gschwunge. Churz vorem Idungglä händ alli iglochet gha  und sind weidli i Horgeberg gange wills agfange hät rägne und lufte. Im "Wintergarte" isch es dä chlä luut worde, aber isch glich gmüetli gsi. Ds Rangverläse isch per WhatsApp durägfüehrt worde. Gwunne hät d Organisatori Nadja, uf ä zweite Platz händs dr Roger, ds Eliane und ds Patrizia gschafft. Härzliche Gratulaziu und hoffentli sind alli, wo mit em Velo chu sind, guet durä Rägä chu.
Fotogalerie

​Rang vier am Bergturnfest Braunwald
Am 13. Auguscht isch üsers Fit+Fun-Team mit em Coach Peter Nef ads Bergturnfescht ds Bruuwald. S Wätter isch super gsi, d Konkurränz au. Gwunnä hät der DTV/TnV Näfels vor Seewis (GR) und Gondiswil (BE). Üsers Team (MTV und FT) isch Vierte worde. Sogar nuch drü FT-Supporterinne sind extra uf Bruuwald g'reist und händ üsers Team agfüüret. 
Ranglischte
Ziitigsbricht im Fridolin 
Ziitigsbricht Südostschweiz

​Silber am GlaBü Kantonalturnfäscht ds Näfels
Vum 24. bis 26. Juni isch ds Näfels und ds Filzbach ds Glarner Bündner Kantonalturnfäscht mit 5300 Teilnehmende gsi. Au üseri fitte Fraue händ zäme mit em Männerturnverein bi Fit+Fun mitgmacht und mitghulfe, as de turnende Verein Netschtal bim drüteilige Vereinswettkampf Frauen/Männer i der erschte Stärkeklass uf em zweite Rang glandet sind. Besser isch nu Urdorf gsi. Allerdings händ nu zwe Verein mitgmacht. Aber da chämmer ja nüt drfür...
Meh Fotinä i dr Fotogalerie
​Nuch ä Teil usem Bericht vum Peter Bäbler
​Uf em Bild undä isch üsers super Fit+Fun Team

Alli vorherige Bricht vu üsernä Aläss sind unter "Berichte" abgleit.

Werum mir im Fraueturnä sind:

D Fraueturnerinne findet d Turnstunde mit em Peter Nef "hammer". Er forderet und förderet üs - und mir forderet nä mängisch au. Und er schaffts immer wieder, üseri Müskeli z straffe und üs öppe au ä Muskelkater azhänggä.
Um dem abzhälfe, gümmer amigs nuch zum Iris i "Sternen" und sorget fürä Flüssigkeits-Nachschub.